Mō Mātou | About Us
Mō mātau o Te Kōhanga Reo o Ngā Mokopuna
Nō te tau 2006 huaina mai ai tā mātau Kōhanga Reo i Te Whanganui-a-Tara nei. He whare āhuru e wheakohia ai ngā mokopuna Māori ki ā rātau anō tikanga, ā rātau anō reo Māori, tā rātau anō ao Māori.
Katoa ngā mahi ka mahia e mātau, he mea whai i tō mātau kaupapa i a Te Whāriki a Te Kōhanga Reo, i a Te Korowai anō hoki. Ko te aronga ia ki a mātau ko te poipoi i ngā rangatira o āpōpō - o mātau mokopuna, e tangata Māori ai rātau i ō rātau anō ao.
Ko te aronga ki a mātau, kia poipoi, kia whāngai i ngā tikanga, i te reo Māori kaua anake ki ā mātau mokopuna engari ki ā mātau whānau anō hoki. Nau mai rā, kia tipu tahi ai tātau!
Ngā Kaiako
Kaiako Matua
Rangi Tangaere
Tū ana au ki ngā karamatamata o ōku maunga tapu o Hikurangi o Tarawera. Kei raro iho ko tōku awa kōpikopiko ko Waiapu, koia ra hoki ko tōku roto ko Rotorua-nui-a-kahumatamomoe. Teretere mai ana ōku waka ko Horouta me Te Arawa. Whakarongo ai au ki ōku iwi ko Ngati Porou me Te Arawa. Tū mai ra ko ōku marae whakaruruhau ko Te Horo me Pikirangi. Whakakotahi mai ai ōku hapu ko Ngati Horowai, me Ngati Hauora.
Mai te kōpū ki tēnei rā tonu kua korowaitia e au i roto i tō tātou kaupapa. Ko te kaupapa he oranga mō āke mo tōku whānau. Ahakoa ngā aupehitanga i ētahi wā, ka kite i ngā hua e whakaora ana i a tātou mokopuna otira o tātou whānau. E mihi ana ki ngā ringa, ngā pakahiwi kaha kua whārikihia i ngā mahi kia puawai tātou mo te anamata. Ko aku tama, tōku whānau, ngā mokopuna, otira to tātou reo rangatira te take!
Kaiako
Analia Scruton-Nepe Apatu
I tipu au ki ngā rekereke o Ruahine Maunga i Ngāti Kahungunu. He Ngāti Kahungunu, Ngāti Porou, Rangitāne me Ngā Rauru ki Tahi ahau. Nōku ka whānau mai i tipu matomato ahau i raro i te korowai manaaki o te kaupapa Kōhanga Reo me ngā pari o Te Aho Matua. He manu pīrere tēnei nō Te Kōhanga Reo o Te Rongopai, he raukura hoki nō Te Kura Kaupapa Māori o Ngā Mokopuna. He kaiwhāngai reo Māori ahau, e poipoi, e whakatipu, e tiaki, e manaaki ana i ngā mokopuna me ngā whānau i raro i te reo Māori me ōna tikanga.
“Nō reira mauria mai ngā tamariki ki te Kōhanga Reo”.
Kaiako
Leilani Scruton-Nepe Apatu
Ki te hauāuru, tū tonu mai Ruahine. Te Atua o Mahuru e toko i te rangi nei. Ngā mokopuna o Rongotautawhi i muri Titimaire. Tohaina te waikohu o runga o Makaretū me Rākautātahi e. He manu pīrere ahau nō Te Rongopai Te Kōhanga Reo o Takapau, he raukura hoki nō Te Kura Kaupapa Māori o Ngā Mokopuna. Kua hoki anō ahau ki te kaupapa i tangata ai ahau, arā ko Te Kōhanga Reo. Ki kōnei whāngai ai ngā reka o te ao Māori.
Kaiako
Parehinetai Sannyasi
Tākiri mai te haeata nā runga i te taumata o Ōtawa Maunga, ka mātai whakararo ki ngā wai rokiroki o ōku mātua tīpuna, o Raparapa-ā-Hoe e karekare atu ana ki tōku tūohutanga, ki Hei Marae.
He manu pīrere ahau nā Te Kōhanga Reo o Tapu Te Ranga ki Paekawawa, ā, I hoki atu ahau ki te āhurutanga o te kaupapa a Te Kōhanga Reo i te whānautanga mai o tāku mataamua, e iwa tau ki muri- ki reira tau ai.
Kaiako
Deljah Dunn
He manu piere nō te whare Kōhanga Reo, he raukura nō te tāhūhū o Te Aho Matua. E tū ana hei kaiako i Te Kōhanga Reo o Ngā Mokopuna.
I au i te kōhanga, e maumahara tonu ana i te harikoa, i ngā waiata, i ngā karakia, i te aroha i rongo ia te rā, ia te rā. Nā te kōhanga, i whai hononga ki ngā whānau katoa o te whare, nā tēnā i puta tāua hononga i te kōhanga, ka whai ko te kura tuatahi, te whare kura, tae noa ki naianei. He hononga motuhake ka puta mai i ngā whare Kōhanga Reo.
Nā te ao Māori au i whakatipu, ko te whāinga, kia whakahoki ki te ao i whakatipu i au. Kia whakatipu i ngā rangatira mō āpōpō. Kia tū hei tāhūhū mō ngā mokopuna i te ao, i te pō.
Kaiako
Tohu-ana-te-rangi Waetford-Heketa
Mauri ora ki a tātou! He uri whakaheke nō Te Arawa, Ngāti Whakaue. He manu pīrere tēnei nō Te Kōhanga Reo o Pukeroa Oruawhata ki Rotorua. Kua 4 tau e noho ana hei kaimahi ki te Kōhanga Reo o Ngā Mokopuna, ā, he kaipupuri hoki o Te Tohu Paetahi Tino Rangatiratanga. Ki au, ko Te Reo Māori tētahi o ngā tino tāonga kua tuku mai ki au, ā, ka tika ka rere taua mihi ki te Kaupapa Kōhanga Reo. Nō reira au i whakatau kia whakahoki i taua tāonga kua noho pātara ki taku ngākau ki ngā rangatira o āpōpō, otirā, Te Kaupapa Kōhanga Reo.
Kaitautoko
Sonny-Rangimārie Scruton-Nepe Apatu & Kahimia-Baden Ewart-Tangaere